Instalaches a botella de CO₂ do sistema antiincendios na xTool P3, pero xTool Studio segue a dicir que non hai botella: avísache ao lanzar un traballo, ou nos axustes do dispositivo aparece como «non instalada». Antes de pensar nunha avaría, case sempre é unha de tres cousas: a botella toca a carcasa, non cumpre as especificacións, ou lle queda pouco gas.
Esta guía adapta ao galego a documentación de soporte de xTool sobre o erro de botella non detectada na P3. Aquí somos honestos: nós non tivemos que tocar a botella desde que a montamos, así que o procedemento de diagnóstico é o oficial. O que si poñemos é o contexto de por que esa botella non é opcional.
Por que isto non é un aviso menor
A botella alimenta o sistema de extinción interno da P3. Se a máquina non a detecta, estás cortando sen extintor, e iso nun CO₂ de 80 W non é un detalle de configuración.
Por que o sistema non a ve
A P3 detecta a botella por dous vías: un sensor de peso e un interruptor físico que se activa ao enroscar a botella completamente. Se calquera dos dous non dá sinal, o resultado é «non instalada». De aí saen as causas:
- Mal colocada: a botella roza a carcasa metálica exterior e parte do seu peso descárgase alí.
- Pouco gas: o peso total baixou do umbral que a máquina considera botella válida.
- Botella non compatible: rosca distinta, non chega a accionar o interruptor por moito que apertes.
- Sensor de peso descalibrado: necesita un reset por software.
- Cableado solto no sensor de peso, no interruptor de detección ou no módulo de extinción.
Comprobacións sen abrir a máquina
Por orde, do máis simple ao máis raro:
- Hai botella, de verdade? A P3 non inclúe botella de serie. Se veu nun bundle, comproba que está montada e non na súa caixa.
- Céntraa no soporte. Ten que quedar máis ou menos no centro do seu ancoraxe, sen tocar a carcasa metálica. Se roza ou apóiase contra ela, o sensor mide menos peso do real e dáa por ausente. Desmóntaa e volve a montala centrada.
- Enróscaa ata o fondo. O interruptor de detección só se activa coa botella completamente enroscada. Se notas que topa antes, non forces: é un problema de rosca, non de aperto.
- Pésaa. Sáea e pon na báscula de cociña. 700 g ou menos: está esgotada, cámbiaa ou recárgaa. Máis de 700 g: ten gas suficiente e o problema está noutro sitio.
As especificacións exactas
Se a botella non é a correcta, non hai aperto que valga: non chega a accionar o sensor. Estas son as specs que pide a P3:
- Tipo: botella de carbonatador / soda de 0,6 L.
- Capacidade de CO₂: mínimo 400 g de recheo.
- Rosca do pescozo: M18×1,5.
- Rosca da válvula: TR21×4.
Son as medidas estándar das botellas de carbonatador de auga con gas, que é unha sorte: atópanse e recárganse en España sen depender de xTool. Se vas mercar unha de reposto, verifica as dúas roscas —hai botellas de 0,6 L con pescozos distintos— ou tira da botella da propia marca e aforras a comprobación.
Reset do sensor de peso
Se a botella está ben posta, é a correcta e pesa máis de 700 g, o seguinte paso é recalibrar. En xTool Studio: … > Axustes do dispositivo > Axustes do dispositivo > Restablecer, e segue as indicacións na pantalla para resetear o sensor de peso. Unha desviación acumulada de calibración fai que o sistema lea mal o peso aínda que a botella estea chea.
Se hai que abrir a máquina
A partir de aquí desmontase a carcasa, así que: desconecta a P3 da corrente antes de nada. xTool ten vídeo de montaxe e desmontaxe das tapas, e convén velo antes de comezar.
- Panel esquerdo — sensor de peso. Revisa os conectores do sensor: mira se algún está frouxo ou desconectado. Enchúfaos a fondo, monta de novo a tapa, conecta e reinicia.
- Panel traseiro — interruptor de detección. Co panel fóra, enróscaa botella e comproba se chega ata o final. Se non chega, é a botella: cámbiaa por unha que cumpra as roscas. Se chega ben, revisa os parafusos de suxeición e o conector do interruptor; desenchufa e volve enchufar, monta e reinicia.
- Módulo de extinción. Se todo o anterior está correcto, o módulo de control do sistema antiincendios pode estar avariado e toca substituílo. Iso xa é soporte.
Para o ticket, ten preparado: descrición do problema e pasos que fixeches, foto ou vídeo da botella instalada, a lectura da báscula e os conectores, o número de serie e o rexistro de traballo exportado. Se tarda en avanzar, pódese escalar por Discord.
Preguntas frecuentes
¿Podo seguir traballando mentres o soluciono?
Podes, pero estarías cortando sen extinción automática. A nosa recomendación —e a de xTool— é que non, sobre todo en corte e nunca desatendido. Nós pasamos por aí sen querer e acabou en dous lumes.
A botella é nova e aínda así di que non está instalada.
Mira primeiro se roza a carcasa: é a causa máis frecuente e a máis fácil de pasar por alto, porque a simple vista parece ben posta. Despois, comproba as roscas (M18×1,5 no pescozo, TR21×4 na válvula) antes de sospeitar do sensor.
¿Como sei cando se está a quedar baleira sen esperar ao aviso?
Pésaa. Por debaixo de 700 g de peso total está esgotada. Se fas moito corte, apuntar o peso cada poucos meses evítache descubrilo o día que fai falta.
¿Serve calquera botella de sifón das de supermercado?
Só se cumpre as catro specs: 0,6 L, 400 g mínimo de CO₂, pescozo M18×1,5 e válvula TR21×4. O formato é o habitual dos carbonatadores domésticos, pero hai variantes de rosca. Comproba antes de mercar.
Escriben Noemi e Javi, de Picasita. Usamos unha xTool P3 en produción desde outubro de 2025; somos afiliados de xTool. Esta guía adapta a documentación oficial da marca; o orixinal está no seu centro de soporte. Máis tutoriais e solucións.
0 comentarios