A xTool P3 corta ben —atraviesa o material completamente— pero o bordo sae amarelo ou directamente negro, como queimado. A reacción instintiva é baixar a potencia. Case sempre é un erro: o problema non adoita ser o láser, senón o aire de asistencia. Imos velo por orde.
Esta guía adapta ao galego a documentación de soporte de xTool sobre malos resultados de corte na P3, co que comprobamos no taller.
Por que o aire, e non a potencia
Cando o láser corta, queima material e xera fume e gases xusto na liña de corte. O chorro de aire de asistencia (o air assist) ten unha misión dobre: afasta o fume para que o feixe chegue limpo, e arrefri o bordo. Se ese aire falta ou é débil, o fume queda na ranura e volve queimar contra as paredes do corte. O resultado é exactamente ese: un bordo amarelecido ou ennegrecido, aínda que a potencia sexa a correcta.
Por iso, antes de tocar potencia e velocidade, hai que descartar o aire. Estas son as causas, da máis común á menos:
- Parámetros de procesado incorrectos.
- Boquilla de aire (air nozzle) sen instalar.
- Caudal da bomba mal axustado.
- Fuga na tubaxe de aire.
- Problema da propia bomba.
1. Software e firmware ao día
Soa a tópico, pero é o primeiro paso oficial por algo: asegúrate de que xTool Studio e o firmware da máquina están actualizados. Moitos comportamentos raros corrixen aquí sen máis.
2. Revisa os parámetros
- Materiais oficiais de xTool: usa os parámetros recomendados tal cal. Están calibrados para a máquina.
- Materiais doutro provedor: non adiviñes. Lanza un Material Test Array (a matriz de proba de potencia e velocidade de Studio) e queda coa combinación que corta limpo. Son cinco minutos que che aforran media chapa estragada.
3. Comproba a boquilla de aire
A boquilla de aire é a peza que dirixe o chorro ao punto de corte e axuda a evacuar o fume. Se non está posta, o aire non chega onde ten que chegar.
- Se non está instalada, instálaa.
- Se fas gravado e corte mesturados no mesmo traballo, plantexate separar os procesos (gravar primeiro sen tanto aire, cortar despois coa boquilla), ou montar a boquilla segundo o que pida cada fase. O gravado e o corte non queren o mesmo fluxo de aire.
4. Axusta o caudal da bomba
Este é o axuste que máis veces resolve o problema e o que máis xente ten mal sen sabelo.
En Ajustes do dispositivo → Caudal de aire (Airflow), comproba que en modo Corte o caudal está ao 100 % (que é o valor por defecto). Se está máis baixo, súbeo.
Un matiz importante: ese 100 % de caudal aplica só ao modo Corte. Para gravar non necesitas —nin queres— tanto aire, así que non te asustes se en gravado o valor é menor. O bordo queimado é un problema de corte, e é en corte onde o caudal ten que estar ao máximo.
5. Fugas e bomba
Se coa boquilla posta e o caudal ao 100 % o bordo segue queimándose, queda descartar a parte física: unha fuga na tubaxe de aire (unha conexión solta perde presión antes de chegar á boquilla) ou un problema da bomba en si. Aquí xa convén revisar o percorrido do aire e, se nada cambia, abrir incidencia con xTool.
E un apunte de mantemento que vai moi ligado a isto: o filtro da bomba de aire ensúciese rápido e asfixia o caudal. Se fai tempo que non o limpas, empeza por aí —contámolo en a guía do filtro—, porque un filtro saturado dá exactamente este síntoma.
Preguntas frecuentes
¿Non sería máis fácil baixar a potencia e xa está?
Baixar a potencia co aire mal pode deixar o corte incompleto e seguir queimando o bordo. Estarías tapando o síntoma e creando outro. Arranxa primeiro o aire; moitas veces cos parámetros orixinais o corte sae limpo en canto o caudal está ao 100 %.
Corta ben pero só se queima nalgunhas zonas da chapa. ¿Por que?
Adoita ser evacuación de fume desigual (unha zona peor ventilada) ou a peza lixeiramente despegada da base, que afasta a boquilla. Suxeita ben o material e comproba que a boquilla queda á altura correcta en toda a superficie.
¿Cada canto reviso o filtro da bomba?
Ao diario en uso normal, e cada 8 horas se fas xornadas longas de corte a alta potencia. É a causa silenciosa nº 1 da perda de caudal.
Escriben Noemi e Javi, de Picasita. Usamos unha xTool P3 en produción desde outubro de 2025; somos afiliados de xTool. Esta guía adapta a documentación oficial da marca; o orixinal está no seu centro de soporte. Máis tutoriais e solucións.
0 comentarios